Corren tiempos complicaus, d’una perfonda crisis sanitaria, sozial y economica. Un diya buscan a culpabilidat en a chen inconszién e irresponsable. A l’atro diya ye a choventut y os suyos bureos, lifaras y botellóns. Dimpués risulta que son as treballadoras y os treballadors d’as residenzias de viellos. ¿Maitín? Quemisió!

Tanimientres a Consellería de Sanidat d’o Gubierno d’Aragón ha facultau a lo Servizio Aragonés de Salut ta modificar o calandario de vacazións d’os suyos treballadors si asinas lo creye convenién y seguntes cada zentro.

Una vegada más ye a clase treballadera y a ziudadanía d’a pié, qui paga con tot. Ye zierto que ye una situgazión muito complicada, rarenca y de difizils soluzións. Amás economicamén as instituzións s’han visto afeutadas. Con poquet marguin d’autuazión recortando en tot o que no ye Sanidat y politica sozial pero, ¿no ye posible contratar nuevos sanitarios que permitan, a lo menos, que os treballadors de sanidat disposen d’unos diyas de merexiu discanso y desenchegue? Se fabla de “repescar” a chubilaus de sanidat menors de 70 añadas, entiendo que de maniera voluntaria, pero no de contratazión de sanitarios. ¿Cuántos chubilaus retornarán a la faina? Sapemos que bi ha muitisma solidaridat drento d’a sanidat. Son presonas con un corazón espezial y, de vez, fuerte pero querer carregar de faina a unos sanitarios con poquet descanso y unos chubilaus solidarios no me parixe la millor soluzión. Como tampoco no me parixe correuto querer culpabilizar a un seutor poblazional ta esbarrar l’atenzión y que no fiquemos a güellada enta qui son os responsables de buscar soluzións ta convivir millor con a COVID-19, y mirar de que ista no se’n esparda u propague, entre que os despertos troben una vacuna u a maniera de rematar con o cuco.