Fa unas semanadas leyébanos en as retes sozials que lo coche de línia Teruel-Montalbán-Zaragoza iba a dixar de fer o serbizio los sabados. Ista trapala, que a la fin no ye estada totalmén zierta, iba acompañada de creticas enta la Direzión Cheneral de Transportes d’o Gubierno d’Aragón y a la Consellería de Vertebrazión d’o Territorio, Movilidat e Vivienda.

O Conzello de Montalbán, en un bando, anunziaba la supresión d’a linia los sabados y uns dias m ás tardi, deziba que “Tras las gestiones realizadas por este Ayuntamiento con la Dirección General de Transporte” tornaba a prestar-se lo servizio. Dezir que en a Direzión Cheneral no lis consta denguna chestión d’o dito Conzello.

Fablando con a suyiza Direzión Cheneral. mos informan que dixón de prestar-se un 49% d’os servizios de transporte de viachers en marzo por a pasia. En a Orden de Nueva Normalidat siñata por o Conseller de  Vertebrazión d’o Territorio, Movilidat e Vivienda en o mes de chunio, se dezide restablir os ditos serbizios si bien s’incluye que, eszezionalmén, os prestadors d’os servizios de transporte publico regular de viachers podeban solizitar una reduzión d’o numero d’espedizións d’o servizio a prestar, guarenzian-se, cutio cutio, la esplotazión de toz os traficos incluyitos e acreditando as ragóns que chustifiquen a petizión de reduzión.  E asinas, a interpresa prestadera d’o servizio solizitó suspender o servizio d’os sabados chustificando-se en a escasa demanda d’usuarios.

En cualsiquier caso, dende a Direzión Cheneral de Transporte informan que, en vistas a la demanda ziudadana abida,  definitivamén, tamién va a zercular os sabados o coche de linia Teruel-Montalbán-Zaragoza en os dos sentitos. Asinas, chino chano, se’n van recuperando los servizios de viachers de Teruel e lo Baixo Aragón istorico. Esistiba tamién  lo problema en as comarcas de Baixo Martín, Baixo Aragón y Andorra Sierra de Arcos, más que más, en tracheutos d’os cabos de semana e igualmén s’han restrituyito mientres lo mes d’octubre.