O pasau viernes, 21 de abril, se zelebró o «IV Seminario Multidisciplinar sobre el Plurilingüismo en España», que organizan as fundazions Ortega-Marañón y Joan Brosà.
L’acto se fazió en o Senau con partizipazión de miembros de os grupos parlamentarios de PSOE, Cd’s, PNV, PP y PDCat. No i estieron ni Podemos, ni dengún senador aragonés (bi ha 14).
O director cheneral de Politica Lingüistica d’o Gubierno d’Aragón, José Ignacio López Susín, presentó a situazión lingüistica en o nuestro País. En a suya intervenzión, de cuasi noventa menutos, López Susín reclamó un mayor reconoximiento d’as lenguas minoritarias no ofizials como l’aragonés y o catalán d’Aragón, y lamentó que a «Ley orgánica de reconocimiento y amparo de la pluralidad lingüística de España», que se ha prenzipiau a tramitar en as «Cortes Generales», se olvide de a suya situazión, “ya que se corre el riesgo de caer en una nueva discriminación por una ley que debe tener como objeto, precisamente lo contrario”, ha dito.
En a suya comparezenzia o director cheneral ha feito, antimás, un recorriu istorico dende a formazión d’os romanzes aragonés y catalán en os intes de a creyazión d’o reino, a introduzión d’o castellano, más que más a partir d’o siglo XV, y as dificultaz con que se han trobau as dos luengas uei minoritarias, sobre tot dende a perdida en 1707 d’a independenzia, dica o rechimen franquista. Ha meso de relieve o nuevo eszenario que se ubrió con a Constituzión de 1978 y o Estatuto d’Autonomía, espezialmén tras a reforma de 2007 y a promulgazión d’as dos leis de luengas por as Cortes d’Aragón.
López Susín tamién ha desgranau as actuazions levadas a cabo dende setiembre de 2015 tras a creyazión d’a Dirección Cheneral, ta la dinnificazión de l’aragonés y o catalán d’Aragón: l’aprobazión d’os currículos de ambas luengas, con un creximiento porzentual importán (más d’o 25%) d’o lumero d’alunnos d’aragonés en o curso 2016/17; a puesta en marcha d’un proyecto piloto en 7 colechios de l’Altoaragón ta la implementazión de l’aragonés como luengua vehicular, grazias a un convenio con a Universidat de Zaragoza; a recuperazión de programas y premios literarios que eban estau suprimius por l’anterior echecutivo; a convocatoria de subvencions y ayudas y a creyazión de nuevos programas de difusión, asinas como de sendos premios onorificos ta reconoxer a trayectoria de personas y entidaz, y tamién a puesta en marcha d’a pachina web lenguasdearagon.org.
Tot ixo en o marco d’un prozeso de dinnificazión y recuperazión d’os dreitos d’os fablans d’as luengas minoritarias d’Aragón, en concordanzia con o establito en as leis y trataus internazionals que obligan a l’Estau español y a las Comunidaz Autonomas, y mui espezialmén d’a Carta Europea d’as luengas rechionals y minoritarias d’o Consello d’Uropa, cualo representán en España ye estau presén en l’acto.
López Susín ha meso de manifiesto o valor inclusivo d’o conoximiento d’ista pluralidat por parti de toz os ziudadans, independientemén de en do vivan u qué luenga charren, y que “la recuperación del patrimonio lingüístico es tarea de todos, no solo de las Comunidades Autónomas, sino también del Estado”.